Sachent toutz que en nostre court de Sainct Nazaire sest au jour duy comparu par davent nous messire Pierre Lemareys pretre se submectant et se submist deffait en tant que mestiez est avecque toutz et chacun ses biens par son serment soubz et aupovoir [destroict][] [seigneurie] jurisdiction et obeissance devoir de court quant a tout ce qui ensuyt faire tenir et acomplir lequel messire Pierre o ladicte sumission fut et est congnoessant et confessant et par ces preentes congnoest et confesse o et [] Charles de Kersal escuyer seigneur de Trignac present et acceptant que combien que en ce jour il eust achate et acquis de Margarite Bonnet veuve de deffunct Jacques Leray le nombre et somme de quarante soubz de rente que ladicte Margarite disoit avoir prandre et lever et luy estre deuz chacun o et sur Olivier et Charles Esprez sur et par cause dune tenue de heritaige nommee la tenue de la Bourgonnays sise en la paroesse dAveczac et avoit este la dicte vente faicte de ladicte Margarite audict messire Pierre pour la somme et nombre de quarante libvres monnoie dont ladicte Margarite sestoit tenue a contente dudict Pierre par le poiement quelle eut de luy en la presence des passeurs qui passerent ledict contract ainsi que plusaplain il est contenu oudict contract fait entreux date le VIIe jour de febvrier lan mil cinq cent troys passe de R. Duboisorhant et deJ. Coronne que en la verite du fait tel contract et achat quil en avoit fait avoit este et estoit pour et au nom du dict de Kersal et de son bien et leluy  avoit baille pour ce fere a ledict messire Pierre pour luy et ses hoirs voulu et octroie et consentz veultz et octroie et consenty audict de Kersal quil ses hoirs et cause aians joissent ou temps a venir desdictes quarente soubz de rente [] dudict contrat quil avoit fait o ladicte Margarite et le droit quil y avoit de luy a baille et transporte et le y a subroge et subroge et luy en a cede et cede laction et interestz a en faire [jugement] ainsi que bon luy semblera et verra lavoir a fere et les choses et chacune dessus dictes  jura et promist ledict messire Pierre Lemareys par son erment par davent nous tenir sent james encontre venir et y fut de son assentiment par le jugement de notre dicte court comdempne - donne tesmoign le scel estably aux contractz de notre dicte court fait et giee le Xe jour de febvrier lan mil cinq cens troys coust et dempneure sept [] donne comme dessus